Estatuko kontratu publikoek BIM metodologia txertatu beharko dute

Estatuko Administrazio Orokorreko eta sektore publikoko kontratazio-organoetan 2024. eta 2030. urteen artean BIM metodologia pixkanaka ezartzen joateko Plana onartu du Ministro Kontseiluak. 

Garraio, Mugikortasun eta Hiri Agendako idazkariordea buru duen Ministerio arteko BIM Batzordeak landu du plana, eta Estatuko Aldizkari Ofizialean (BOEn) argitaratu ondorengo egunean sartuko da indarrean. 

Kontratazio publikoan BIM metodologia erabiliz helburu bikoitza lortu nahi da: gastu publikoaren efizientzia hobetzea eta eraikuntza-sektorearen eraldaketa digitala bultzatzea. Eraikuntzarekin lotura duten askotariko kontratu publikoetan BIM metodologia erabiltzeko jarraibideak ematen dizkie planak kontratazio-organoei. 

«Planak helburu bikoitza du: gastu publikoaren efizientzia hobetzea eta eraikuntza-sektorearen eraldaketa digitala bultzatzea». 

Planean kontuan hartu da ETEak kontratazio publikoan sartzeko aukera ere, eta, horretarako, kontratazio-organoek BIM metodologia erabiltzeko egutegi progresiboa ezarri da. 2024ko apirilean hasiko da, balio handiko kontratuekin, eta BIM metodologiaren erabilera-maila handituz joatea aurreikusten du, betiere eskatu beharreko segurtasun- eta elkarreragingarritasun-baldintzak betez. Metodologia ezartzeko epea 2030ean bukatuko da. Ezarpen-prozesu koordinatua eta progresiboa errazteko, bost maila aurreikusten ditu planak, eta batetik bestera aurrera egiten joateko baldintzak azaltzen ditu. 

Ministerio arteko Batzordeak landutako Kontratazio Publikoko Estrategia Nazionalarekin lerrokatuta dago BIM Plana, eta batzorde tekniko baten laguntza izango du. Batzorde horretako kideak adituak dira BIM metodologia sektore publiko zein pribatuan ezartzen.Planean aurreikusita dagoenez, Ministerio arteko BIM Batzordeak ezarpena errazten lagunduko du. 

Ildo horretan, Ministerio arteko BIM Batzordeak komunikazioko eta hedapeneko ekintzak egingo ditu, gida gisa erabiltzeko material berria landuko du eta BIM metodologiari buruzko berariazko prestakuntza sustatuko du eremu publiko zein pribatuan. 

Kontratazio publikorako BIM Plana ikusteko, egin klik hemen 

Iturria: Garraio, Mugikortasun eta Hiri Agendako Ministerioa