BIM Plana abiatu dute kontratazio publikoan

BIM Euskadi Batzordeak pozik hartu du plana abian jartzearen albistea, «eraikuntzaren eremuan trantsizio digital eta jasangarria egiteko bidean lorpen erabakigarria» delakoan. 

Apirilaren 1ean ekin zaio BIM Plana ezartzeari ministerioan; horrenbestez, BIM metodologia sartuz joango da kontratazio publikoan. Planak agintzen duenez, kontratazio-organoek BIM metodologia txertatu beharko dute eraikuntzarekin lotura duten kontratu publikoetan. Mailaka egingo da, kontratuaren balio zenbatetsiaren araberako aplikazio-egutegia kontuan hartuta. 

BIM Euskadi Batzordearen iritziz, «eraikuntzaren eremuan trantsizio digital eta jasangarria egiteko bidean lorpen erabakigarria da BIM Plana, BIM metodologiaren ezarpenean inplikatutako eragile guztien ahalegina bideratu eta batuko duelako, funtsezko iparrorratz gisa. Helburu komunak ditugunez eta planak lan-estrategia partekatua ezartzen duenez, gure ekintzak lerrokatu eta haien eragina maximizatu nahi dugu». 

Arduradunek gaineratu dutenez, «ikuspuntu bateratua izatea eta estandar komunak erabiltzea funtsezkoa da gure aurrerabidea ebaluatzeko. Elkarrekin eta norabide berean lan eginez bakarrik neurtu ahal izango dugu zehazki non gauden BIM metodologia erabat integratzeko bidean». 

Azkenik, adierazi dute ekosistema sendo eta eraginkorra eraikitzeko nahitaezkoa dela erakunde publikoek zein pribatuek aldi berean aurrera egitea, bateragarriak diren tresna eta prozesuekin. «Horixe da bide bakarra BIM metodologiaren potentzial osoa garatu eta haren onurak lortzeko, efizientzia operatiboari eta ingurumen-jasangarritasunari dagokienez. 

Plan progresiboa 2030era arte 

Plana nahitaez bete beharreko barne-instrukzioa da aipatutako administrazioko kontratazio-organoentzat eta haien menpekoentzat, eta gomendioa Estatuko sektore publikoko gainerako erakundeentzat. Dena den, kontratazio-organoak BIM metodologia ez erabiltzea erabakitzen badu, justifikatu egin beharko du planean aurreikusitako kasuetan, adibidez, hauetan: konkurrentzia mugatzea, premia, efizientzia eta errentagarritasun falta. 

Planean zehazten diren bost BIM mailak —BIM aurrekoa, hasierakoa, ertaina, aurreratua eta integratua— metodologia mailaka ezartzeko faseak dira, erreferentziatzat erabiltzen direnak kontratazio-organoek egin beharreko ekintzak zehazteko. 

Era berean, BIM metodologia enpresaren eremu jakin batzuetan —estrategia, prozesuak, teknologia eta pertsonak— aplikatzeko era jasotzen du planak. 

Azkenik, metodologia integratzeko egutegi progresiboa finkatzen du, 2030era artekoa, kontratuen atalase ekonomikoen arabera. 

Informazio gehiago esteka honetan