Durangoko Udalak eta Aramotzeko Auzo Elkarteak sustatutako Berritu Aramotz azterketari erantzuteko sortu zen proiektu hau. Azterketa horren helburua da zenbait ildo nagusi eta jarduera-estrategia ezartzea, baztertuta geratzeko arriskua duen Durangoko auzo bat energetikoki birgaitzeko, irisgarritasuna hobetzeko eta berrurbanizatzeko.

Proiektuak auzoa osatzen duten 16 atarietan esku hartzea planteatzen du. Horretarako, inguratzaile termikoa jartzea eta eraikin bakoitzean komunikazio-gune berri bat eraikitzea proposatzen da, etxebizitzen energia-efizientzia hobetzeko eta irisgarritasun unibertsala bermatzeko. Proiektuaren bidez, eraikitako multzoaren duintasuna berritu nahi da, betiere auzoaren eskala domestikoa eta izaera auzotarra zainduta. Horretarako, fatxada-sistema aireztatua baliatzen da kanpoaldeko kaleetara ematen duten fatxadetan, eta patioan eta barruko kalean, berriz, SATE sistema bat. Etxadi-patioan instalatutako igogailuek arintasuna eta gardentasuna dituzte bereizgarri, iragazkortasun bisuala bermatzeko. Igogailuek metalezko egitura dute, eta inguratzailea, berriz, beirazkoa eta polikarbonatozkoa da.

Auzoa birgaitzeko estrategiaren barruan, gainera, etxadia zeharkatzen duen erreka urbanizatzeko eta birbideratzeko lehiaketa bultzatu da, eta MaaB Arquitectura y Urbanismo eta SOIL Arquitectura del Paisaje enpresek osatutako ABEEa izan da adjudikazioduna. Urbanizazio-proiektuaren irismenak, ingurune hurbila eta etxadi-patioa hartzeaz gainera, BI‑623 errepidearen ondoko eremuan ere esku hartzen du, Larrinagatxu erreka birbideratzea planteatzen baita. Urbanizazio-proiektuak auzoaren espazio publikoa eta haren inguruak konfiguratzen ditu, eta erabiltzen dituen soluzioak naturan, drainadura jasangarrian eta auzoan zaharkitutako hiri-instalazioak berritzean oinarrituak dira.

• Arkitektura-eredua, birgaitze- eta irisgarritasun-proiektua definitzeko planoekin.
• Komunikazio-gune berrien planoak definitzeko egitura-eredua.
• Urbanizazio-eredua.
• Etxebizitzen egungo egoerari, eraikuntza-ezaugarriei eta ezaugarri energetikoei buruzko datuak.
• Herritarrek proiektu-prozesuan izandako parte-hartzeari buruzko datuak.

Irudi eta dokumentu bisual eta argigarriagoak lortzeari esker, askoz ere samurragoa izan da komunikazioa sustatzaileekin, hau da, bizilagun-komunitateekin. Eredua datu-biltegi gisa erabili da, inkestetatik, herritarren parte-hartzetik eta EITetatik lortutako feedbacka gordetzeko.