Proiektu hau baterako lizitazio baten zati da. Lizitazio horretan, beste bi bloke garatu dira, energia-eraginkortasuna optimizatzeko eta eraikuntza jasangarria izateko irizpideen pean. Eraikina dagoeneko eraikita dagoen ingurune batean egingo da, eta baldintzetako bat izango da egitura egurrezko panel aurrefabrikatu eta autosostengarrietan oinarritzea, irtenbidea ahalik eta industrializatuena izan dadin.

BIM metodologiari dagokionez, proiektuak bi helburu ditu; batetik, BIM metodologiaren laguntzarekin proiektua kalitate handiagoarekin garatu ahal izatea eta, bestetik, metodologiak izan ditzakeen zailtasunak, abantailak eta hobekuntza potentzialak probatzea. Proiektuak, halaber, tartean den estudioarekin harremanak izateko modu berri bat ezarri du, non ereduaren gorabeherak ereduan bertan oinarritutako BCF plataforma batean erregistratuko diren.

Horrela, ereduaren bidez egingo da proiektuaren beraren jarraipena, eta, horri esker, hobeto egiaztatu ahalko dira eraikuntzaren egokitasuna eta eraikinaren diseinuaren berrikuspena nahiz kudeaketa. Era berean ezarri denez, eredu digitalaren diseinuak eta egituraketak Alokabidek etorkizunean aktiboan egingo dituen mantentze-lanei begiratuko diete lehentasunez, alokairuko etxebizitza-sustapenen kasuan.

Oraintxe bertan, proiektua planteatuta zegoen bezala ari dira garatzen; oinarrizko proiektua eginda dago dagoeneko, eta dagokion eredua entregatuta. BIM metodologiaren abantailen artean, tokiak eta eraikuntza-soluzioak 3D-n bistaratzeko ahalmena dago.

Proiektuan, datu-ingurune partekatu batekin ari dira lanean, eta, horren bidez, bezeroak garatu den eredura sartzeko baimena ematen du karpeta espezifiko batean. Gainera, eraikinaren behe-solairuaren eta sotoaren arteko solairua kalearen mailan erraz ikusteko aukera ematen du ereduak, bi solairuetarako sarbidea nola ezartzen den argi eta garbi ikusten baita bertan.

Bestalde, prozesu pilotua denez, ezin izan dira metodologiak eskaintzen dituen aukera guztiak baliatu. Adibidez, oinarrizko proiektua idazteko prozesuan, erabakiak hartzeko jarduera eta diseinu-aukeren azterlana metodo konbentzionalagoekin egin dira, eta ez eredua erabiliz. Bistaratzea, informazioaren kudeaketa eta proiektuaren kudeaketa, berriz, BIM metodologia oinarri hartuta egin dira. Gaur-gaurkoz, egikaritze-proiektua amaitzea eta ereduaren kudeaketa obrara eramatea falta da.