2021eko urtarrila.- Lehenengo aldiz, AP-8a, Artxandako Tunelak eta Metropoliaren Hegoaldeko Saihesbidea kontserbatu, mantendu eta ustiatzeko kontratuek BIM metodologia erabiltzeko betekizuna sartu dute, bai eta ingurumen-jasangarritasunaren eremuan edo errepidearen sentsorizazioan berrikuntzak egiteko neurriak aplikatzekoa ere.   Halaxe jasotzen da Interbiak sozietateak (Bizkaiko Foru Aldundiaren Ekonomia eta Lurraldea Garatzeko Sailari atxikitako foru-sozietate publikoak) sustatzen dituen zerbitzu horien kontratuen lizitazioan, zeina 2021eko ekainetik 2026ko ekainera bitarteko bost urteko aldirako argitaratu den. Azpiegitura egoera onean edukitzeko prebentzio-operazioak egitea da bi kontratuen xedea, baita ibilgailuak seguru eta arintasunez ibiltzeko baldintzak bermatzea, segurtasun-baldintzak kontrolatu eta hobetzea eta bidesarien kobrantza kudeatzea ere.   Bada, BIM teknologia erabiltzea izango da Bizkaiko Foru Aldundiak azpiegitura berri guztien eraikuntzarako ezarri dituen betekizunetako bat (eraikuntzari buruzko informazioa jasotzeko eredua da BIM, ingelesezko sigletan). Gainegituren proiektuei dagokienez, MHSn erabiliko da BIM lehenengo aldiz; horrela, edozein talka-guneri aurrea hartu ahalko zaio, eta arazoak aurretik konpondu.   Halaber, kamerak, haizagailuak, sute-ahoak, seinaleak, argiak eta abar ezin hobeto egokituko zaizkio azpiegiturari, eta mantentze-lanak askoz ere eraginkorragoak izango dira.   Kontratu horien lizitazioaren oinarri-prezioa 150,5 milioi eurokoa da: horietatik 79 milioi AP-8aren kontraturako izango dira, eta 71,5 milioi Artxandako Tunelen eta Metropoliaren Hegoaldeko Saihesbidearen kontratuetarako. Edonola ere, abonatzen diren zenbatekoak askotariko irizpideak betetzearen mende egongo dira, eta, horri begira, Bizkaiko Foru Aldundiak ebaluazio-adierazleak ezarri ditu, hainbat eremu balioesteko; hala nola: bide-segurtasuna, laneko segurtasuna, erabiltzaileen erreklamazioak, kontserbazio- eta zaintza-zerbitzuaren kalitatea edo erabiltzaileei eragindako kalteak.

Argazkia: Deia

2020ko urria.- Dair Ingeniariak enpresa bizkaitarra garraio- eta trafiko-lanetan, trenbideetan, ingeniaritza hidrauliko eta hidrologikoan eta ingurumenean aditua da, besteak beste, eta Mamarigako tunelen BIM ereduaren proiektua aurkeztu du Autodesk Españaren Excellence Talks saioan.

Aurkezpen birtual horretan, Idoia Martinez Dair Ingenieros enpresako BIM managerrak eta Victoria Ureña Autodeskeko Infrastructure Technical Specialist teknikariak hartu dute parte.

Aurkezpenari esker, Dair Ingenieros enpresak informazioa nola zentralizatu zuen eta proiektuaren dokumentaziorako sarbidea nola eman zuen ikusi ahal izan da. Bada, Revit, Dynamo eta Civil 3D softwareekin garatutako ereduetatik abiatuta sorturiko eredu federatu bat erabili zuten horretarako.

Dair Ingenieros enpresak negozio-eredua aldatu zuen duela urte batzuk, enpresan BIM metodologia ezarri zuenean.

2020ko apirila.- Euskal Trenbide Sarea/Red Ferroviaria Vasca (ETS) enpresak bere BIM eskuliburua argitaratu du, bere enpresa laguntzaileei zuzendutakoa (hau da, zerbitzu-hornitzaileei, kontratistei eta azpikontratistei), metodologia hori haien lan-prozesuetan ezartzeko prozesua erraztu eta azkartzeko helburuz.

Eskuliburua jarduketaren fase guztietan (diseinuan, eraikuntzan eta mantentze-lanetan) erabiltzeko moduan prestatu da, BIM informazioa proiektuaren fase guzti-guztietan ekoizteko eta entregatzeko lan-esparrua zehazte aldera.

BIM metodologian, hiru dimentsiotako eredu birtual bat egiten da, eta, bertan, proiektu edo jarduketa integral bati buruzko informazio grafiko eta ez-grafiko guztia, informazio ekonomikoa eta denborari dagokiona sartzen da. Parte hartzen duten agente guztiek eredu berberean egiten dute lan, eta, hortaz, ereduari egiten zaion edozein eguneraketa automatikoa da, eta agente guztiek aldi berean izaten dute horren berri.

2020ko uztaila.- Eraikuntza Industriaren Klusterrak (Eraikune) Euskadin BIM metodologia ezartzeari buruzko lehen txostenaren emaitzak aurkeztu ditu (txostena BIM Euskadi Behatokiak egin zuen).

Emaitzetan ikus daitekeenez, 2019an Euskadiko eraikuntza publikoari bideratu zitzaion aurrekontuaren % 11,42 “BIM metodologiarekin” egin zen; hau da, eraikuntzaren industriaren sektoreko balio-kate osoa biltzen duen eredu digital batean oinarrituriko lan-eredu batekin. Guztira egin diren 167 proiektuetatik 15 metodologia horrekin egin dira, ildo horien pean.

BIM Euskadi Behatokia autonomia-erkidego batean sorturiko lehenengoa izan da, eta 2018an sorturiko BIM Euskadi Batzordearen tresna izateko jaio zen, metodologia hori eskualdeko eraikuntzan eta obra zibilean (obra publiko nahiz publikoan) neurtzeko, ikusgai egiteko eta sustatzeko helburuz.

Lehen txosten horretan, zeina Eraikunek eta North BIMek egin duten eta Eusko Jaurlaritzaren Ingurumen, Lurralde Plangintza eta Etxebizitza Sailaren laguntza jaso duen, 2019ko eraikuntza publikoari buruzko datuak aztertu dira, eta urteko azterlanen sekuentzia abiatu da horrela, metodologiaren jarraipena eta ezarpena egiteko. Analisi horri, eraikuntzaren alderdi pribatuari buruzko datuak eta obra zibil publiko nahiz pribatuari buruzkoak txertatuko zaizkio, eraikuntza-jarduera guztien gaineko ikuspegi osoa edukitzeko.

2019ko DATUAK

Eraikuntza-proiektuaren faseen arabera, obra-egikaritzeak, diseinuak eta zuzendaritzak izan dituzte BIM metodologiarekin egindako proiektu gehien (seina); gero, nahiko urrutira, diseinua, obra-zuzendaritza eta laguntza teknikoa daude (bana), eta ustiapena eta mantentze-lanak, giltza eskura eta BIM ereduen sorkuntza faseek ez dute proiekturik izan.

Eraikuntza-tipologiaren arabera, ekipamenduen inguruko proiektuek erabili dute gehien metodologia (6), eta, gero, etxebizitza (4), industria (3) eta hirigintza (2) datoz.

Lurraldeen arabera, Bizkaian egin da lan gehien metodologia horrekin (lizitatu diren 5 eurotik ia 1ean); hau da, lizitazioen guztizko aurrekontuaren ia % 15 metodo horrekin babestu da. Atzetik Gipuzkoa dator, guztizko aurrekontuaren % 6,5ekin, eta, azkenik, Araba, oraindik ez baitu parametro horiekin lizitaziorik egin.

Lizitazio-erakundeen arabera, BIM sistemaren alde gehien egin dutenak Eusko Jaurlaritzaren Etxebizitza Saila eta Sprilur izan dira.

Metodologia hori txertatu duten proiektuei dagokienez, % 31k soilik jasotzen du berariazko partida bat pleguaren barruan, horretarako aurrekontu batekin.